نجلة سعيد صالح تطلب الدعاء لوالدها وليس بالمهاترات

علقت هند نجلة الفنان الكبير الراحل سعيد صالح على حديث البعض على مواقع التواصل الإجتماعي عن عدم حضور الفنانين إلى جنازة والدها وأن هذا يعد "جحود" في حق والدها، قائلة في صفحتها على موقع التواصل الإجتماعي "فيسبوك": "طيب .. بعد اذنكم انا بطلب من كل اللى فكر و قرر ان الفنانين ماعندهومش اصل و عندهم جحود عشان محدش جه جنازة بابا بدل ما يشغل نفسه بده يشغل نفسه بالدعاء ليه .. افيد له لانه محتاج ده .. لحظة ما ‫سعيد صالح توفى انا اللى قررت سرعة الدفن .. لان اكرام الميت دفنه .. و لان بابا كان موصى يدفن فى مسقط رأسه فى المنوفيه .. و لأن كان عندى سفر ساعتين عشان اوصل للمقابر .. و لأنى كنت عايزة الحق نور ربنا .. و لأن حاجات كتير مش مضطرة اشرحها .. باختصار اولوياتى ادفن اب توفى .. مش فنان توفى .. طبعا انا عارفة ان مصر كلها حزينة عليه و ده على راسى .. بس ده مش سبب لاتهام حد بالجحود .. الفنانين دول اهلى نمرة 2 .. و محدش سابنى .. و على ما الناس عرفت كنت انا سافرت .. و اهتمامي الاول و الاخير كان بسرعة دفنه .. و بدل ما كان 1000 واحد هيمشى فى جنازته في القاهرة لقيت محافظة المنوفية كلها فى جنازته هناك .. و اللي هنا و اللي هناك عند ربنا واحد فى الأجر و الثواب .. فلو سمحتوا ادعوا له بس هو محتاج ده ولا حاجة غير ده .. و من فضلكم كمان مرة محتاجة احزن على ابويا فى سلام مش فى مهاترات لا هتودى ولا هتجيب لانه هو اصلا فى حتة تانية خالص"
العزاء ان شاء الله الثلاثاء فى مسجد عمر مكرم".