"مرتضى منصور" يحذر "وايت نايتس" من الاقتراب من نادي الزمالك

حذر مرتضى منصور، رئيس نادي الزمالك، أعضاء رابطة ألتراس «وايت نايتس» على الهواء من الاقتراب من نادي الزمالك خلال وقفتهم، الأحد، المزمع إقامتها بميدان سفنكس اعتراضا على القبض على بعض أعضاء الرابطة.

وقال منصور في تصريحات لقناة «الحياة 2»، مساء السبت: عمري ما دافعت عن الألتراس، دافعت فقط عن عمرو حسين الشهيد الذي مات خارج النادي برصاصة من داخل النادي«.

واضاف: «اللي عمل الألتراس في الزمالك وكان صاحبهم هو ممدوح عباس، رئيس النادي الأسبق، وهو اللي كان يمنحهم تذاكر السفر مع الزمالك لبطولات أفريقيا، وهو من حرضهم لاقتحام مؤتمر وزير الرياضة السابق العامري فاروق».

وأردف: أقول لهؤلاء الداعين لوقفة الغد، قلة الأدب مش هتيجب نتيجة معايا أنا رجل بلطجي اللي هيعتدي على هعتدي عليه، واللي يحترمني أشيله فوق دماغي.. لكن هتعمل بلطجي عليّ لأ أنا عندي ناس يقفلوا المهندسين كلها«.

واستطرد منفعلا: «كل بلطجي في الوايت نايتس هتجرب وتقتحم النادي وتعور ناس، لو السماء انطبقت على الأرض مش سايبكم، لكل أب وأم لهؤلاء البلطجية فيه حاجة اسمها حق الدفاع عن النفس، هتقرب من بيتي أو بوابة النادي هتاخد طلقة ولا لك دية وكله بالقانون، وهذا حق الدفع الشرعي عن النفس والمال، الدولة كلها في انتظاركم غدا، وكل النادي مسلح، مش أنا اللي قلت ده، لكن ربنا اللي قال الكلام ده».