"أولتراس" أهلاوي ينتقد الداخلية في بيان له بالقول "طريقتكم خايبة"

أصدرت مجموعة "أولتراس" أهلاوي، اليوم الإثنين، بيانًا للتعقيب على أحداث القبض على 19 شابًا من المجموعة في أحداث مباراة كرة اليد.

وقالت المجموعة في بيانها: "من يوم الجمعة اللي فاتت وإحنا بنتفرج على مسرحية وحتى كنا شايفين إنها مش مستاهلة مجرد التعليق عليها وقلنا أن ده أكيد تهريج وأكيد المسؤولين هيتكسفوا من الاتهامات المكتوبة في المحضر".

"خلينا نقول مبدأيًا كده ماتشات دوري كرة اليد طول السنين اللي فاتت بجمهور وهو الدوري الوحيد اللي بيتلعب بجمهور بشكل رسمي وجمهور الأهلي كل ماتش كرة يد بينسّق من قبلها مع رئيس اتحاد كرة اليد شخصيًا وده اللي حصل في الماتش ده فبالتالي المشكلة مش عند الجمهور المشكلة عند أي طرف من الاتحاد أو النادي أو الأمن".

"وبالمناسبة لحد دلوقتي الماتشات بجمهور ومفيش قرار رسمي من الاتحاد المنظم للعبة بيقول كلام غير ده، كلام الاتحاد ملزم للأندية والداخلية في أي مكان في الدنيا".

"وفي مصر بيبقى على حسب المزاج، بمعنى أن اتحاد كرة القدم بيلعب الماتشات دون جمهور والداخلية دايما بتقول انها بتطبق قرار اتحاد كرة القدم ، طيب لو النادي جه طلب الماتشات بجمهور هل الداخلية هتسمح ولا هتقول الاتحاد المنظم للعبة مانع ؟!!.. ده بالضبط اللي حصل ماتجيش تقولي النادي بيطلب عدم تواجد الجمهور في حين أن الاتحاد المنظم للعبة بيسمح".

"احنا بس مش فاهمين مين في الآخر اللي بيعادي مين؟ ومين اللي بيحاول بكل جهده يبعد الجمهور عن المدرجات ويحاول يخليه يتواجد في الشارع بيجري ورا صحابه المحبوسين؟؟

بس احنا فاهمين كويس مين بيدير موضوع الجمهور في مصر والأشيك ليكم ولشكلكم أن وزارة الداخلية تبقى بتدير اتحادات كرة القدم واليد والسلة على الملأ والمكشوف لأن بجد طريقتكم خايبة وشكلكم وحش".

"من ضمن الاتهامات محاولة اقتحام النادي وهو الماتش بجمهور وكمان الجمهور ماراحش ناحية النادي والأمن كان مانع أي حد في الشارع يعدي من عند الأوبرا. وفي اتهام تاني بالتجمهر، ياعم والله الماتش بجمهور !!!.. اتهام كمان بمحاولة الاعتداء على قوات الأمن، طيب مفيش ولا محضر واحد ولا تقرير طبي مثلا باللي تم الاعتداء عليهم؟!!وفي اتهام بقطع طريق بس لحد دلوقتي لسة محدش يعرف أنهى طريق !!". وبعد الطريقة الخايبة والمفضوحة دي كلها القضية اتحالت لمحاكمة عاجلة بكرة -الثلاثاء- للشباب المحبوسين وعددهم ١٩ راجل من جمهور الأهلي.

محاكمة عاجلة لجمهور كان رايح يحضر ماتش بجمهور ودي طبعا جريمة وجريمة أكبر من جرايم القتل وتجارة المخدرات في بلدنا عشان كده اتحالت في يومين لمحاكمة عاجلة". مش مكسوفين من نفسكم ومن اللي بتعملوه ؟!  خلونا نشوف المسرحية دي آخر فصولها هيكون ايه... الحرية للجمهور